بوساره في العماره

سلام

طبعا مثل ماوعدت في بوستي السابق انه راح يكون في بوست اتكلم فيه عن المسرحيه


اول شي بالنسبه حق مسرحيه تنعرض من عيد الفطر للحين "ماشالله " عشان ماصكهم بعين

الحضور كان وايد حلو يعني اغلب الاسطر مفوله

اللهم يمكن بحدود ال 10 كراسي او اقل اللي فاضيين "ماشالله "

المهم اول مادشينا قعدنا باماكنا على اساس انه المسرحيه تبلش الساعه 8

احلى شي انه احنا من قبل كنا ماجرين المسرح
وانا ناسيه شوي من الشروط فا كان فبالي ممنوع الاكل داخل

واقص على ولد خالتي اقوله ممنوع ومسكين مصدق وشوي ويبجي بروحه كل همه بطنه :p

بعدين يوم طلع عادي شوي ويدوس فبطني احس الروح ردتله :p

المهم قعدنا وكانت شاشه العرض نازله ومادري ليش حطوا اغنيه برنامج طول بالك

شنو علاقتها بالمسرحيه مادري :s
وحتى لو دعايه البرنامج انعرض وخلص

ثاني شي اول ثلث ساعه جدا مليت والله وصلت فيني ضغطي مليون كان عادي امشي

لانهم اغنيه ورا اغنيه يا اغنيه البرنامج يا اغاني الفلم

واحنا زهقنا نبي المسرحيه تبلش

بس اتوقع لانه كان في ناس قعد يدشون وعلى مايقعدون وهيك

المهم هذا اول شي بايخ كان بالمسرحيه

بعدين بلشت المسرحيه وبلش الضحك


كمسرحيه صج حلوه وضحكت وايد وهذا شي جميل لاني صعب اضحك :p

بس من الاشياء اللي تنرفز

1- الجمهور اللي ورانا
السطره اللي وراها كان في ياهل "نظام توه بالغ " وشاد حيله

كله نرفزني شويه قاعد ويصرخ ويطلع اصوات عالممثلين
ويع يعني صج عيب اوكي في ناسس تتحمل بس في ناس حرام تنحرج
مثل احمد الشمري "الولد صارله فتره مو امثل وتوه راد بهالمسرحيه"
لمن طلع صفقوله الجمهور يقوم ينط الياهل اللي ورا ويقوله " جب جب"

يعني قمه في الوقاحه الولد انحرج وصج كبر يعيني انه مارد عليه لانه الياهل قمه في قله الادب

2- ثاني شي هم بالجمهور السطر اللي ورا اللي ورانا قروب شباب كامل يايين مع بعض وطول الوقت يسولفون وبصوت عالي
"ياجماعه نبي نطالع مو وقت قرقتكم "
احلى شي انه اليهال اللي ورانا كل شوي يتناجرون مع قروب الشباب اللي وراهم


3- اللي يغث الانسانه اللي قاعده جدامي
كثر ما الله قدرها مكبره كبتها
اول شي شخباري نظام كبه كبيره والله خلاص خلصت الموضه يا ماتلبسينها اذا شعرج طويل او حطي وحده صغيره

لاني صج ماكنت اشوف من راسها وكل شوي اروح يمين ويسار والحبيب كثر ما الله مقدرها يا ترفه نفسها يا تتكلم بالتلفون يا تدزدز مسجات
"بس مسكينه ماتدري" كل اللي وراها قروا مسجاتها :p


4- اللحين بعيد عن الجمهور بالمسرحيه نفسها
اهي المسرحيه حلوه وتضحك وخفيفه لدرجه ماحسينا بالوقت انه 4 ساعات بس احس وايد ناس مهضوم حقهم ولو دورهم كان اكبر جن المسرحيه تضحك اكثر

يعني ناس انا احبهم بكل مسرحيات طارق
مثلا هيا الشعيبي اتوقع انه دورها المفروض اكبر من جي بس يمكن ضاع وسط المسرحيه والمشاهد المقطعه
يعني اول مسرحيه احس انه هيا مالها دور معنها دمها خفيف واحبها احس المفروض كان اكبر

غير هيا نواف النجم " ياخي حلاه هالريال بملاقته وامس مادري ليش وايد كان ساكت
بوايد مشاهد بس جي قاعد ماكان يتكلم ولا شي
غير افيهاته اللي لطشوها عليه :p واهما يطفرونه
ذكرني باللي يطلع بخاربه خاربه بس يقعد عالقنفه ومايقول شي

وهم سلطان ولد طارق يعني الولد صغير وهم بكل مسرحيات طارق دوره اكبر بس بهالمسرحيه يطلع دقيقه وحده بمشهد واحد واصلا للحين ماستوعبت هل اهو دوره بالمسرحيه ولد طارق ولا بس جي طالع

في ممثل احمد الفرج " انا ماحبه احس قطاته شوي مليقه مو وايد هذا خذا اكبر من حجمه بالمسرحيه مع احترامي لشخصه بس احس الاسامي اللي ذكرتها فوق شخصياتها اونس والمفروض ياخذون مساحه اكبر

في واحد اسمه محمد العلي مادري ليش يحطونه انا استملقته اب خاربه خاربه وهم بهالمسرحيه استملقته
احس يا يكون مفيد يا ماله داعي

وفي ممثله يديده مصريه ماعرف اسمها والله
البنيه كتمثيل تعرف تمثيل ودورها بالمسرحيه اوكي بس لمن صارخت بطت طبله اذني فا اتمنى ماتصرخ وايد

بس عجبتني حركتها :p


وحتى فرحان العلي كسر خاطري والله يمكن انا متعوده انهم بكل مسرحيه يطلعون اكثر من جي او يمكن اهما مساحتهم كانت وايد وانا ماحسيت مادري




اللحين الاشياء اللي حبيتها بالمسرحيه :

1- احب تفاعل طارق مع الجمهور يمكن في ناس مايعجبهم انه يعلق ويضغط بس الموضوع غشمره يعني اللي يفرق بطارق عن الباجيين انه عادي يسولف مع الجمهور يعني امس ضحكني لمن "الياهل المليق اللي قاعد ورانا" قام بيشتري نفيش او شي واهوا قايم قال حق طارق وقف المسرحيه بروح اشتري وارد " وصج وقفها نطروا الصبي ليمن رد كلموا بس ضحكوني :p
وهم مادري شلون اشرح بس احب انه مسرحياته مو بس نص وممثلين وديكورات وقول وخلاص لا كل عرض احسه غير لانه كل جمهور غير وكل تفاعل شي ثاني
يعني احسه يتفاعل مع البيئه اللي حولينه ويمشي معاها

2- المسرحيه كقصه وكقضايا تعرض لها صج حلوه يعني he update the script according to what's going arround in kuwait
يعني عالمجلس
عالبنات والشباب وجي

احس من ناس وايد ثانيين

3-حبيت الاغاني كلماتهم عبيطه تضحك يعني من اول مادشينا واحنا نمشي بسم الله قبل ماتبدا المسرحيه ضحكنا :p

4- النظام بالمسرحيه كان شي جميل بكل مكان موزعين ناس مثل security ينظمون الاماكن ويسكتون المزعجين واللي يغلطون



المهم هذا اللي اتذكره لي اللحين

واذا صار في كلام زياده ارد :p

وشكرا

تومورو وما ادراك ماتومورو

مرحبا


كيفكن


بقولكم شي بس لاتضحكون علي :p

انا عمري بحياتي مارحت مسرحيه "يعني المسرح التجاري" رايحه مسرح الشباب واشياء سوالف الجامعه


بس مسرحيات ضحك وجي متعوده اشوفهم بالبيت



فا تغييرا للجو والاوضاع الراهنه

معزومه باجر على مسرحيه طارق

"بوساره في العماره"

فا اول شي الله يستر
يا انطق يا اتهاوش يا ابجي

يا مايصير شي

يا اضحك واستمتع وارد :p


وطبعا بما انه مهنتي في الحياه النقد فا اكيد في بوست ثاني اتكلم عن المسرحيه

ولو انتي ماتوقع بانتقد لاني احب طارق دمه خفيف وقطاته قويه :p


نراكم قريبا

شالسخافه؟؟

سلام

شلونكم شخباركم؟؟

الموضوع اهو

صج شالسخافه شفيهم الناس سخيفين؟؟


يمكن الجو يدعو الى السخافه


مايندرا بس صج ويع لمن يصيرون اللي حولينكم متناقضين ومايدرون شيبون جدامكم بويه ووراكم بويه



واللي يغث اكثر اذا كانوا اهلكم يعني بنات خالتكم وخواتكم متربين مع بعض



بما انه لساني فالت فا عادي بقول
السالفه ومافيها انه منذ فتره لا باس فيها

i loved someone


والمفروض انه
he loves me back

الوضع كان طبيعي وكل شي بالسليم وفي حدود الاحترام

this someone is kind of famous

او بلالصح

عنده
his base of fans

وو am ok with that

لاني فبساطه اقدر من يقدرني

مابي اقول انه اللي صار غيره بس صج مادري شنو تفسيره

وحده من بنت خالتي ورفيجتنا "اهي البنيه رفيجتنا من عمر" ومتزوجه "يعني شتبين


من اللحظه اللي دروا عن هال someone
اول شي تغيروا علي وايد صرت اذا سولفت معاهم والا قلتلهم عن سالفه او شي حتى لو شي عادي يحقروني ويفرون وييهم ولا جني اسولف

وقلت مابي احط فبالي
يمكن مو قدصهم

شوي شوي قاموا يشيوني

ترا احنا قعد نسمع حجي مو زين عن هالشخص
وانتي شلون ترضين يكون الوضع جي
ومن هالكلام

وهم اتبعت معاهم نظام احقر لانها باختصار my life

وبديت اوخر عنهم لانهم قاموا وايد ينرفزوني يعني لاقمت اروح بيتهم وحتى اذا يوا بيتنا ماقعد معاهم او اطلع بس عشان افتك من كلامهم

قاموا يروحون حق بنت خالتي الثانيه ويقولولها اني صايره سخيفه وعايشه الدور وايد

واني مصدقه عمري وايد

هذا شي

الشي الثاني اللي جدا وقح وماتوقعته يطلع من بنت خالتي

"قاموا يقولون حق الكل " هذي جيكره وايد مو شويه شلون هال someone معطيها ويه

اكيد اهيا قاطه روحها عليه :s

اهوا عمي مو شايف اهيا شكثر جيكره
اهو يومين وبيزهق منها

صار الموضوع اللي مافي غيره عندهم " انه انا وايد وايد جيكره والوع الجبد وشلون حصلت اللي ابيه :s

امبيه والله مو من صجهم حتى لو انا جيكره اهما شحارهم

والمشكله وحده منهم متزوجه يعني تكفى شتبين "يرحم مج جابلي ريلج وولدج" وخليني عنج

وزنهم وحجيهم مابطل

until the thing happened

we broke up وصار اللي اهما يتمنونه

مو بس اهما وايد ناس قالولي نفس الجمله

شلون وشلون

استغفر الله

الله ياخذهم حدي منبطه جبدي وحاقده

عليهم وعلى هال someone


غاثيني وماقدر اقوهلم اني ادري اهما شقعد يقولون

المشكله انهم جدامي يسون روحهم خوش بنات وهاليومين صايرين يحبوني بس عشان يطلعون بسيارتي :s يعني نظام مصلحه
وكل شوي داقين بنطلع تعالي وبنطلع تعالي

ويتعمدون يغثوني واهما يدرون انه we broke up

ويع اكررهم ودي احرقهم

شسوي فيهم تكفى