دكـــــتاتـــــــــورية المـــــامــــــــــا

دكتاتوريه الماما

وما ادراك ماديكتاتوريه الماما

ميخالف اهي امي وعلى عيني وراسي

بس ينرفزني او بلغه اصح تنرفزني تدخلاتها الدايمه في حياتي

او محاولاتها اللي تبوء بالفشل لانها تتدخل في حياتي

دايما تحب تفرض علي اشياء حتى لو انا ما ابيها .. يعني مثلا فلنفرض انا ابي شي اوكي اتييبلي من النوع اللي ابيه بس تغير وتعفسلي مواصفاته فووووووووق تحت

يعني احس احتمال يصير انقلاب لو يابته بالمواصفات اللي ابيها

***

خل اقولكم هالسالفه اللي صارلها 4 سنين غاثتني وقاهرتني

هذي السالفه طبعا بالاضافه لاني من انولدت لي يومكم هذا مالقيت لا من الماما ولا البابا ادنى درجات التقدير على اي شي اسويه

اللهم تتشيحط فيني جدام الناس وبس ماتفكر تكافئني ماتفكر تشتريلي هديه

انقهر انا دارسه وناجحه يايبه المعدل الفلاني حتى مبروك مالقى منهم

اللهم اسمع اييه بنتي يابت جذي وبنتي جذي

واذا يا احد مسكت المجله شوفوا بنتي حاطينها بالمجله

شوفوا بنتي مسويه هالمقابله

بنتي كاتبه هالمقال

زين ياماما شعلينا بالناس شافوا والا ماشاوفا انا احترميني قدريني ماكو

..

المهم سالفه الاربع سنين

قبل اربع سنين ولمن كنت على مشارف الجامعه وبما اني طلعت الليسن يت الماما وقالت بتشتريلي سياره

وتاخذني وتفرني عالوكالات وانا يماه ابي جيب واهي لا جيب يقلب

بعدين لا جيب غالي

لا جيب مادري شنو

حنيت حنيت ليمن اخر شي رضت بشرط جيب صغير ورخيص

والى شي انها تمت تفرفرني عالوكالات عالطل

يعني اخر شي بعد مامارسوا جماعات الضغط المتمثله باختي الكبيره ويويو اخوي اللي الله خالقه عشان يطفرني

رضخت لهم وعطتني سياره اختي اللي اكبر مني القديمه عشان اسوقها واقزرها فيها وهالحجي فبدايه السنه الجامعيه

على اساس

وعد مني بس يصير شهر 12 اشتريلج السياره اللي تبينها

انا سكت مافجيت حلجي قلت يالله كلها سياره توديني وتييبني

هالشهر 12 لمده اربع سنين ماوصل بتقويم الماما

يعني وانا انطر شهر 12

تعرضت لاقسى انواع الطنازه والتعذيب من كل من هب ودب وسكت وطوفت ولا فتحت فاهي بادنى كلمه

لين قبل جم شهر وفي مشارف ال 2008

القت الماما العزيزه على مسمعي شي الصراحه للوهله الاولي عبالي نكته

كنت انطرها تضحك بس طلعت السالفه جد :p

بنشتريلج سياره

وتبدا رحله البحث من اول ويديد عن جيب صغير ويناسبني يعني

اسبوعين افتر من وكاله لي وكاله اسال عن جيب جيب

الاسعار

المواصفات

الاقساط

واي كل شي احس بس صرت خبره بالسيايير

بعدها قالتلي نطري 120 تنزل

نطرت وانزلت وقالوا مايصير تاخذون فيها شي

بعدين نطري لي شهر 5 يبدون يحسبونها من المعاش واخذلج

وهم نطرت صار شهر خمسه

صار شهر 6 وانا ساكته

بس مرارتي انفقعت خصوصا انه محفوظه السلامه اللي اتولى قيادتها يوميا عطتني عمرها

وقامت تمسخرني كل يوم اكثر من اللي قبله

يوم واقفه البطاريه خربانه

يوم التكييف خربان والغايش مقطوع

ويوم ينقطع غايش ثاني ويقفل السكان بالشارع

هني طفح الكيل وفاض ووصل حده :p

جن اشن ليهم الحرب

واعلنت العصيان

لين رضخوا لمطالبي وراحو سوو اوراق السياره

الدكتاتوريه تطلع اهني

انا طلبت طلب بسيط

قلت ابي جيب وابي لونه اسود

شالصعب بالقصه؟؟

وين المعضله

اول شي وافقت وبعدين قامت تتحجج لا مافي بالوكاله

رحت الوكاله والا الريال يقولي في اسود بس يصير اقوى فور باي فور

والفرق بينه وبين اللون اللي امج نقته انه امج منقيه فور باي تو وو رنجات

والاسود في منه فور باي فور وطوس

قلتله زين وفرق السعر قال بس 100 دينار وراح نطيحه

زين دام في سياره اقوى واللون اللي ابيه ليش ماتقولي :(

قلتلها وشكلها انحرجت ورضت

يومين ولمن خلاص صارت اوراق المعامله وكل شي تمام التما بس باقي تحديد المواصفات والتوقيع وخلاص عالاسبوع الياي السيار عندي

حاطتلي الماما ريل بالسما وريل الارض ماتاخذين اسود

الا بني

يا بنت الحلال انا بخاطري اسود

تقةلي لا تعاندين انا امج

ويبدون اللي ينرفزون من زوار البيت ليوم اليمعه يتدخلون

اييه كلام امج عدل

الاسود حر

الاسود يبين فيه الوصخ

الاسود والاسود

زين ستوب

الاسود يبين فيه الوصخ؟؟

ترا مو صعبه ماي وصابون وتمت العمليه بنجاح شدعوه قاصركم ماي بالبيت؟؟

شنو الاسود حر؟؟ خو من داخل السياره بيج ومو يلد شالعياره؟؟

يا خي خلاص انغثيت من مراحل الدكتاتوريه المتعنته اللي صلولها

ماقمت اتحملهم اكثر من جذي

مايصير انا اللي بسوق ولازم اتقبل واتكيف مع اللي بسوقه

الاسود يعني الاسود انا نقيت

بس شلون افرض لوني على لونهم :p

يارب متى تفكني من الدكتاتوريه المتنعته

اهما مالهم حق

الرب عطانا عقل نفكر فيه ونختار

مو لانهم امنا وابونا واهلنا يعني يفكرون ويختارون عنه

لازم يفهمون هالاشي لانه بس وصلت لمرحله الانفجار :@